Kamogod da se zaputi,

va svit kamogod da se gre

blisko va duši se ćuti

i vavik lipo zasope.

 

Ne more se nigdi lipje

duša radovat čez vrime,

sriću čut kad smih rasipje,

nigdi lagje spustit brime.

 

Oblaki kad se ricaju

il se nebo modro glanca

si anjeli  mi kantaju

a š njimi i srce tanca.

 

Povečerje mi dišeće

friškinu razgrne širon,

Ričina sanje vrišćeće

blagoslovi, škropi miron.

 

Planine kad spuste vlasi,

ča z mirlići rubi poje,

sunce svoj feral već gasi

va filet navriza boje.

 

Note z vršićih polete,

zatancaju friške trave

ditelina kušin plete,

parićan za trudne glave.

 

Samo tu se sanja more

dičit miron i bit bajna;

se lipote doma zbore

sred pletera zavičajna.